2018年4月12日星期四

生日在台北:雲南菜與藥燉排骨

有朋友話,喂,你去台北無食地道野咩?做乜成日唔係西餐就日本菜?有!當然有啦!無論在地朋友或者同事,我非常樂意佢地帶我食地道菜,又或者中菜,今次都食左兩餐值得介紹一下。

首先位於中山區,一家非常老字號好多食客而且晚市收九點雲南菜館。人和園雲南菜,同事預先訂位,星期六晚上,早已客滿,我們七點半入座。

由於只有兩個人,而眼望餐牌實在好似樣樣都想食。當我地煩惱之際,有位侍應姨姨非常好,推介我地食乜,仲講明,兩個人,叫咁多夠架喇,唔夠再點。

我最鍾意呢類老實又貼心既阿姨。
干扁香菇,應該有幾種菇類,用醬油干扁,再加辣椒,惹味乾身而仍充滿菇香,絕不油膩,非常推介!
筊白筍牛肉片,家常味道,筊白筍清甜牛肉嫩滑,調味都點到即止未有遮蓋材料本身味道,好送飯一道菜。
  
阿姨表示,兩個人,點一個過橋麵,再加白飯就夠。過橋麵用上玉子麵,阿姨親自在我地面前將薄豬肉片及麵放進熱辣辣雞湯,整好再分兩碗。先試雞湯,嘩,原汁原味鮮甜雞湯,簡簡單單配上絕無鹼水味全蛋麵,肉片腐竹大蔥海帶,已經好好食,後來再加上餐廳辣椒油又另一種美味。
酸菜肉末,阿姨介紹酸菜自家醃製,呢道酸酸辣辣家常菜,每一樣材料切得細細,味道剛剛好,配飯的確無得頂!

我希望下次同多幾個同事食,因為好多好多好多樣野想食都未食到呀!

然後,介紹同事帶我去,內湖區四季補藥燉排骨。首先有少少抱歉,我竟然掛住食無影藥燉排骨!湯好唔錯,味精不多,藥味剛好,排骨大大條好多肉,一人一碗好滿足,湯仲可以再添。點解會影漏?因為掛住用手囉排骨食囉!不過仲有其他推介:
麻辣鴨血,必點!麻辣出色而且入味,只係NT$50咋!
鹵豆干,簡單野但好好食,你睇幾搶手!
極極極極極推介!麻油麵線!同事一開始就叫我點,我好聽話既,一食,啊!不得了,麻油蒜片配上清爽麵線,份量足又唔會膩,真係好喜歡!大家若果過開內湖區,不妨搵下呢間,當日天氣熱午市都坐爆,同事話天氣凍更加旺場!

沒有留言:

發佈留言