2017年11月10日星期五

一個麻甩去東京:第二天(上)(築地場外)

提過了,這次出遊,築地100功不可抹。早一晚很早睡了,但應該太累,結果第二朝未能如願早早出動。從六本木到築地,最方便是坐大江戶線,一出就是築地市場;日比谷線亦可,到達就行多少少,而且會於築地市場另一邊進入。

九點多才到達築地市場站,未出閘見到閘口有中英文提示表示今天是文化節,築地市場休市。同時已經聽到廣東話說:「有冇攪錯呀」之類之類。既然到達,我又有Metro Pass,照出閘,然後,向築地場外出發。

這個鐘數場外都多人,或者因為有遊客被旅行團戇叉叉載來了,咁,都要落車行下架,咪迫晒去場外囉。
 
左圖是山長松江玉子燒,由於100日元一串,一直排長龍。旁邊的烤海鮮也受歡迎的。另外我在場外走了一圈,Kitsuneya牛雜丼當天休息,連帶旁邊走進巷裡的魚生飯小店也休息,另一家節目有介紹的築地どんぶり市場也休息。專售阿波尾雞親子丼的南ばら亭有開業,不過我的目標肯定是鮨國,海膽丼。九點十五分行經門外無人排隊(十點開業),九點三十分再行經,已經有四名香港人排隊,我是第五名。
 
九點五十分,獲派Menu一本,望向後面的人龍,那一本Menu好似移民外國護照咁privileged。十時許,被安排入座,同時已經落埋單喇。
 
坐壽司吧,可以睇住佢地在飯煲內放一條毛巾用來以手隔住毛巾添飯,睇到師傅刀功。
點解有吞拿魚食?點了海膽丼得到的前菜係一小碗雜錦吞拿魚粒,由赤身到拖羅都有,好滿足。
到我喇!小插曲是咁的:我地幾位的確係排頭五位入場,但店家先將做好的兩三份海膽丼向本地客人送上。旁邊幾位香港人以廣東話略略表示不滿,我那一刻的感覺反而是好的:因為本地人優先丫嘛。
 
其實唔大碗,不過我可以話你知,再大碗你就會膩,而呢個大細係剛剛好,海膽都唔知有幾多,鮮甜到不得了,所以聽到有人話平時唔食海膽都會食。果種海水既鮮甜係你就算唔加豉油去食都好好味。

食完係飽,所以行左入去新建既築地魚河岸,入地有地舖與及三樓(二樓遊客不能進入),有海鮮有水果賣咁。

三樓是餐廳,但剛好果日有幼兒用品嘉年華,陽光好好,仲咁岩俾我遇到日本嬰兒爬行大賽。
我真係睇得好開心!

由於之後有lunch appointment食法國菜,不能太過份,於是,只係行過食左個雪糕,節目都有介紹,好多水果味果個:
 
白桃味,仲有果粒,只係三百日元,好好食呀!

我另一日朝早有再黎既,Stay Tuned!

沒有留言:

發佈留言