2017年10月7日星期六

台北食極都有:千一元台幣的Omakase

我那位很識食的朋友P不時會向我推介食好西的地方,而他早前知我要特急去台北,再三提醒我一定要試試這間XXXX的Omakase,由於他的提醒,我就試試在面書向店家訂座。是這樣的,他們是由早上到晚上也是收同一價錢的Omakase,而講明不吃生食的不招待。據知台灣人訂座是需要先付訂金的,我這個香港人,可能是一人前,他們沒有要我先落訂。

吃過了,我的反應是「人都癲下次一定要再來」,而同晚在blog facebook引起各方瘋狂旁敲側擊問我店家名稱,由於我答應過P不可透露我也要遵守承諾,不過其實我提供的資料的確只要Google一下就有答案了,我只可以透露的是在大安區。

晚上八點前到達,小店有三個舖位,中間是放酒的與收銀的,兩邊其實是兩個壽司吧共有十八個座位。可想而知,若果訂了店家預備了食材又不來的話就蝕大本了,訂座需要先付訂金亦很合理,至於各位找到了又如何跟店家商討留座,就看看你們的誠意吧,或者,可以找個台灣朋友幫幫忙。
一個人食被安排在死角位是合理的,但那一晚,旁邊的台灣食客對我很好啊!整頓Omakase歷時一個半小時,我是當天最後一個time slot的。
首先出現的是金木鯛壽司,看著師傅炮製的手勢熟練,整件放進口中一咬,啊,質素很不錯很不錯,千一台幣連加一(即三百多港紙)頭炮(不計前菜)就這樣,會不會不夠飽呢可?
這是我另點的梅酒,充滿碎冰,很好喝。
之後出場的是烤鮭魚白子,即係魚肝,香口到不得了,調味剛剛好,水準是不合理地好的。
這是白魽魚壽司,我每一道都聽清楚師傅介紹,聽不清楚會再問。我中文程度一般,只可以話,刀功啦魚既新鮮程度啦與及調味都非常好囉。
赤身呀,先出赤身(之後有拖羅,咪講笑),齋睇相,你地應該可以略略感受真係堅好食。
這是紅花枝壽司,實在唔曉紅花枝跟普通花枝分別,只是厚薄剛好,這是魷魚壽司非常重要的,而且鮮甜到不得了。
炸香魚,是咁的,之前食得太興奮款款都極得,所以好勇咁一啖咬落頭,苦到我吐番出黎。全晚,只有呢一道菜我唔欣賞。
干貝軍艦,睇住師傅將干貝切好不斷放上去,紫菜當然又脆又香,好享受囉。
 
老遠既師傅竟然竟然竟然正在拆一大隻毛蟹!坐果邊既阿姨當然無錯過立即手機拍拍拍,我就好好奇,喂,呢個價錢播,好好好大隻毛蟹,真係有得食架?
拖羅呀!好坦白當然你唔好要求旬採果個質素(最平都要NTD2,800呀OK?)但絕對精彩,放入口依然是會讚嘆Seafood的。
喂,新鮮鮭魚卵,然後店家自行醃製,所以無一般一咬入口果種咸,而是鮮香與咸香的平衡,第一次食,原來鮭魚卵可以咁好食!
嘩想點先!雖然係細細隻台灣鮑魚,但應該係用清酒炮製,彈牙鬆化鮮甜,我已經不斷向P傳訊息:「喂佢地點賺呀痴線」
鯖魚壽司,配上蔥粒,的確無得輸。
未完未完未完!此乃野生龍躉茶碗蒸,雖然我覺得此道乃全晚我無咁欣賞之菜式但龍躉播,野生播!
點先!星鰻免治赤身小魚生飯,真係開始食到想喊,好食到喊感動到喊。
咁興奮,又見旁邊班Uncles傾得咁膠興,當然啤啤佢啦!
 
睇住師傅s(真係兩個人炮製)呢個燒玉子,認真用心,當然好食。
毛蟹黎喇!一人一份,有蟹肉蟹腳加蟹膏,你話係咪離晒大譜先!乜價錢呀?仲要咁好食!
 
以為尾聲啦,台叔叔見師傅呢一著就話:「這是尾場大放送嗎?」竟然,得到香蔥免治拖羅卷!你知道味,放入口品嚐果一刻,我真係唔知講乜好,真係要讚嘆P感謝P。
味噌湯走清淡路線,對對對,之前已經珍饈百味,最後這個結尾很好,沒有記錯裡面有鮮豆皮的!
我無諗過甜品都咁認真:此乃紅豆泥燒丸子,正宗而好吃,紅豆泥只有天然甜沒有人造的甜味,滿足到不得了。

好喇,咁食法,加埋飲兩杯,我都係千六蚊台幣走人,你話係咪無得頂先!佢地可以簽卡的,不過重點再三提醒:若果閣下搵到呢間,又咁好彩好似我咁唔收訂金就訂到位置,請謹記唔好甩底,影衰香港人,以後大家無得未出發先訂位,就慘慘豬了。

此店應該比較難亂入,或者咁,你身在台灣的話,試試打去問下平日早場,可能有機會既。

沒有留言:

發佈留言