2017年9月16日星期六

胡志明市的味道:Pho以外的越南菜(下)

又到左「再唔寫就唔記得」與及「跟住又飛又儲落一堆」的時候,所以,乖乖寫埋佢。今次想介紹中越與北越食物——根據同事介紹係咁講。

出發前,我記得睇過兩集吃貨四十八小時,有位韓國藝人去左胡志明市,咁當然望下有乜參考資料啦!介紹既都係好遊客,不過最記得係,佢食以下呢樣野,食錯方法。

Bun Cha,北越河內食品。係乜呢?不如睇下上檯既情況先:
每人有一碗烤肉連湯汁,米粉,菜與香葉。咁當然旁邊有調味料啦!果位韓國藝人就好理所當然以為係韓式食法:將生菜包住烤肉,米粉,加辣椒包住黎食,實質係錯錯錯!
其實呢,係將菜呀香葉呀撕碎,其餘都放入碗,加少少清爽湯汁撈一撈黎食。好食,第一唔油膩,第二烤肉係炭烤,香口又已經迫出油份,加埋湯汁內的蘋果片,清爽!
我真係唔夠認識去分唔同地區春卷既分別,總之,我係越南食既春卷,大部份都好好食,呢間既都係,皮薄脆口又足料(豬肉呀)。
羅望子特飲,同事特別點俾我,少少酸少少甜,唔錯的。

重點係,呢餐係好平,好平好平(唔記得幾錢因為同事請)。

然後介紹越南街頭食物——咁呢,出差既我,通常食野都比較小心,今次係同事帶我去一個類似food court既地方,安坐就可以點好多越南街頭小食喇!
烤螺,唔好講笑,好香好鮮,加少少青檸鹽,已經好不得了。
烤帶子,又有另一種醬料,類似魚露。加香葉碎再加少少醬汁已經超好味喇!
越南牛雜!真係神奇,咖喱唔多辣偏甜好重椰奶,牛雜特然間清新左好多,幾好食架!
仲有呢碗特別牛河,有牛丸牛柏葉牛肉牛肺等等,清湯,好食好食!

最後介紹呢餐,越南中部菜式,係令我記住,嗯,下次再去,唔好成日掛住Pho。
餐廳名,好易搵,堅係好食,極極極推薦。另外想講下,menu上咁多款就好好印證,越南菜,好多調味料,煮就比較少調味:
我真係問清楚同事點食架!首先,提供既米紙好軟身,將呢樣果樣加烤豬肉加豬皮包住食,好!好!食!
我細細個係屋企附近越南餐廳食過呢樣野:念肉。今次係烤過既,加埋生蒜與辣椒,無法抗拒!
越式海蜇沙律,喂,好得!首先無過度調味,海蜇無我地香港食海既爽,係偏軟身,加埋脆餅食,很難不愛上!
唔好問我呢條係乜野魚喇,問左同事佢都答我唔出,不過我肯定答你,我竟然食左好多,特別加上呢個青檸汁,的確係越南河鮮無得彈。

其實我仲有一兩餐無介紹既,不過唔緊要啦,下年再去再食其他。

沒有留言:

發佈留言