2017年9月5日星期二

胡志明市的味道:高高的晚餐

在胡志明市吃的是這樣的:午餐完全交由同事處理,他們想帶我吃地道的都沒問題,晚餐我則會好好善用Quota去吃,可能是看來很高級,可能是可以看風景的。

在這一次行程當中,我有兩頓晚餐是位於大廈的高處用膳的。有一頓不太貴,另一頓就的確貴。看看閣下到胡志明市旅遊時,有沒有興趣試一試,畢竟,在胡志明,的確貴都只是等於香港人的一般貴。

首先介紹Saigon Skydeck,一幢六十八層高商業大廈,設有收費觀光層,可以睇晒胡志明市四周風景,由於市內高樓大廈不多,著實是一個不錯的選擇,不過咁,位於五十一及五十二樓,有餐廳及酒吧,風光一樣明媚,有得食有得坐定定,做乜要額外俾錢先係咪?

EON51 Cafe,食越南菜,價錢在香港人眼中絕對抵抵抵,當然,訂檯係比較穩陣。不過要先講解,此大廈雖然應該係胡志明市地標,但地面幾層商場質素有如旺角中心,而且要同五十一樓餐廳有難度,記得問清楚職員,因為又要上又要落扶手梯先可以坐升降機上去。

雖然一人前,我同樣被安排坐於窗邊,風景有幾好?先俾個未入夜你地望望:
好,正如之前有文章我都提及,越南侍應係會話你知,你唔好點咁多真係會食唔晒。首先食左呢個:

蓮藕莖沙律,用上魚露醋同不同的香草,加上熟蝦,因為呢餐係越南第二餐,配上泰啤,我真正覺得自己享受中,沙律調味清爽,食材新鮮,加上價錢只不過係七十蚊港紙左右,咁好View,係咪唔錯先?啤酒仲抵,都只不過五十港元。
呢碗叫Spicy Hue Style Beef Noodle Soup,同事話,唔係平時果隻牛河,呢隻係帶辣,米線款,當地人好鍾意食,問我點解識點。我話,睇餐牌試下新野之嘛。越南既辣唔會好辣,此處湯底亦無味精,所以好唔錯。呢碗,六十蚊港紙左右。
入夜喇,餐廳真係要訂位架,記住記住記住。
結尾點左呢個叫Blue Lagoon既甜品,薄荷雪糕青檸雪芭Curaco甜酒,成件事,好夏天。呢杯要八十幾蚊港紙。
靚景如此,係值既係值既!

臨走前一晚,落大雨,到酒店附近位於Centec Tower廿三樓既Shri Restaurant & bar,呢間,高貴好多!頂樓間吧,我果晚食飯,見到好多穿得非常戰鬥格既少女出現,不過我係去廿三樓食飯既。
先來一杯Cocktail:Ben Thanh Cocktail,好特別,材料特別,上檯仲特別:
成個寶箱上檯,乾冰噴晒煙,又好飲,呃like又得,所以旁邊有位外國女士望見好開心,即刻點左一杯。六十五蚊港紙。
由於餐廳期間限定推西班牙菜,呢個凍湯叫Salmorejo & Ajoblanco,前者乃西班牙蕃茄凍湯,後者乃西班牙白蒜凍湯,配上廿四個月西班牙風乾火腿,中間所有伴碟蔬菜花朵與及火腿粒都食得,好喜歡!九十元港紙左右。
炭烤八爪魚,有少許overcooked,調味得宜,墊底薯仔片是精點所在,將醬汁及八爪魚精華盡收。百二蚊港紙左右。
主菜:美國肉眼扒,炭烤,二百五十克。好食,但我都係覺得,La Villa,無得輸。三百三十港元。
後來食得高興再點一杯long island。
甜品是Creme Brulee,不過不失啦,五十七蚊港紙。

此餐應評價係可以既,不過大家若果記得,我係La Villa都唔駛食咁多錢而且好食過佢,咁當然無風景啦,但若果要風景,我就選Eon51咁囉。

沒有留言:

發佈留言