2017年1月15日星期日

食在上海:圓苑的兩餐

有時真係千祈唔好諗咁多:話說跟上海工作之同學們相約聚聚,佢地決定地點然後通知我,我查一查地圖,得知在酒店附近,無問題,我可以自己去。然後當天上午開會後,同事帶我吃午飯,我只係有一絲想過:會唔會又揀番同一間餐廳呢可,點知,真係!

無所謂,因為我相信間餐廳肯定好出名,否則唔會在地人跟同學都選的,而且,我肯定可以避免點食過既,咁即管等我介紹一下同一日,午餐與晚餐在圓苑是如何。


午餐在梅龍鎮廣場分店(係,我出發往晚餐前曾經一度以為係同一分店,好彩再望清楚先出發),我全權讓同事發辦,睇睇佢點左乜野食(順帶一提,上海人點菜好似都幾誇,次次都點多好多,以下係兩個人食過乜):


蔥燒牛筋,鐵窩上,果然上海菜偏甜,牛筋好鬆化濃味,窩底淋上蛋液,令整道菜無咁油膩。
涼拌海蜇青瓜都無乜好介紹架喇,咁我都係鍾意老吉士蔥油海蜇多少少。
呢味真係要介紹:西芹蘆薈炒秋葵,我肯定好有營養,亦覺得佢炒得唔錯,不過成件事總係怪怪的,唔多岩我口胃。
栥飯糕!我就更加未食過啦!非常有趣既地道小食,將栥飯煎香,唔知幾錢呢呢幾件?



生煎包呢回事今次又真係第一次食,好好好好好多汁好好味。

最後呢道係甜品,好飽既甜品:糯米紅棗,絕對係心機菜啦,以為佢好甜,但唔係,基本上都係紅棗既清甜,但真係好飽囉呢個甜品。
下半場,轉到靜安寺店,人數變成三個人,我都係無乜參與點菜,講過下想食乜,咁又睇下晚餐如何,不過可以肯定,靜安寺店好食過梅龍鎮,同學話,靜安寺店出名喎。

烤夫就唔駛介紹既不過精緻過香港好多餐廳(好似都好應該啦),下面呢個,無記錯係手撕雞,真係好好食,除左擺盤精美,係雞嫩而且剛剛好咸香。
呢個真係要介紹:個名好勁,金牌煮干絲,豆腐干絲,在高湯裡煮,入晒味又滑,個湯鮮濃而清,厲害厲害!
















食唔到東坡肉或者元蹄點都要食紅燒肉啦!老老實實,食呢味,真係唔好唔食肥,唔食肥果個痴很線不如唔好食囉。
















清炒蝦仁,就肯定無龍井蝦仁個價錢咁貴既!蝦靚,簡單炒,加陳醋,已經好不得了。
馬蘭頭都整到咁靚又仲要好食架播!
咸肉絲瓜麵筋煲,應該係當晚比較清既菜式,無味精而且不油膩。

















失憶喇!我記得呢個係魚,但係乜魚呢?有冇人幫幫手?
最後甜品就簡簡單單冰糖雪耳囉!


















呢間菜式多而且似樣,佢地叫上海本幫菜,我唔知係乜啦,淨係知價錢合理而且好味道,當然多人去就食多幾款咁啦!

沒有留言:

發佈留言