唔好俾咁多人知：298 Nikuya Room

著實杜小姐新一集關西攻略並不太吸引，不過我記得介紹神戶一集所有和牛都睇到我口水流，而佢提出一個真理：貴價餐廳通常食Lunch都抵玩好多，這個我們都知，而又真係事實。

正如呢間298 Nikuya Room，自從幾個月前朋友帶過我去，大大話話去左四五次（今日先食完），點解呢？實在好難相信，中環，咁既裝修，食和牛燒烤，抵食之餘仲要質素好唔錯！

是的，真係要訂位，因為店舖有樣野好，座位之間宣間夠大，就算你被安排坐吧檯，店方細心到放上能移動小型屏封，令你點都覺得有多點私人空間。就算吧檯，兩個人一個烤爐，真炭烤播：

其實咁，你唔想食烤肉，得，午市套餐選擇有好幾樣，有Sukiyaki，和牛咖喱，漢堡扒甚至生牛肉石頭窩飯，不過好抱歉，我無食過，我淨係食烤肉Set，仲要只係呢個：和牛小排套餐：

你無睇錯以上呢個套餐午市只需HK$150！

首先，有眼見啦，和牛油花幾靚，係已經醃左所以果個醬汁我次次都無用。自己燒，剛剛好，入口未致於去到即溶，但鬆化充滿牛油香係絕對離晒譜無得輸！白飯就係白飯啦，份量唔細，而前菜都好豐富，白飯前果個係牛舌漬物，然後有蔬菜好新鮮既沙律。

另一邊廂就咁：有泡菜芽菜，前面果碟仔係類似麻婆豆腐，與及海帶味噌湯，每次我都食晒，因為質素唔Hae有水平。

飲品呢？喇即咁，人地收得你咁平，你俾多十蚊就有飲品喇，汽水薑啤綠茶烏龍茶都有，抵俾啦係咪先！

以為我就咁介紹完？未架！若果午市食烤肉餐，你可以俾多五十蚊，就得到佢：

和牛牛舌！五十蚊起碼有十片，而水準之高我應該點形容？你去坊間烤肉店單點一個六七十，無論質素份量都輸佢幾條街，而呢個每次食，水準都咁高，輕輕烤兩邊，入口溶化，人間仙境呀咁鬼平！

所以，我其實唔係好想介紹但無理由咁自私既，記得記得記得訂位，你好可能有機會係果度或者遇上我。