2016年3月4日星期五

出色慈母港孩童

我的二姪女現時唸K3,由於一直久不久有幫忙她與她家姐的功課,我好肯定二姪女現時的功課比起兩年前家姐的功課更深:為何要一個K3的小朋友開始造句呢?都莫講話她要寫的中文詞語,又深又難寫,所以,她照寫,寫完都未必記得,果兩個字,係點讀,同乜意思。

造句呢?我眼見她一連幾日所寫的詞語是「悲傷」、「快樂」、「憤怒」等等屬於形容心情的詞語,老師教他們造句是這樣的:「我感到悲傷」,「我感到快樂」,「我感到憤怒」。其實係唔係即係教多佢「我感到」呢三個字呢?不過當小朋友功課越來越深,家長的確越來越頭痕。


早幾日午飯後於升降機內,聽到一名媽媽講及應該唸幼稚園的子女,在做功課時的問題。她表示,人仔細細要佢寫日記,於是做阿媽既除左要教佢諗有乜好寫,仲要教佢寫--佢識得幾多字呢?例如佢想寫「我今天吃了雲吞麵。」阿媽就要逐隻字逐隻字教佢寫,因為,可能除左我今天吃了,其餘都未學過。

由於小朋友被要求越寫越多字,於是,字體開始核突,因為寫得辛苦。另一位阿媽表示,有時見子女功課的字體醜樣,想叫佢寫過,子女都開始抗拒。然後有人回應:「有一次阿女作左句句字,寫晒,唔記得中間加逗號。我話要加番,佢差D喊出黎話唔好,因為要刷走好多粒字先可以加番個逗號,即係又要寫多次好多粒字。

然後,有個阿媽表示:「教佢寫咁多粒字即係我辛苦,我有時偷雞幫佢做功課,俾佢發現就話『媽咪你唔好再幫我做功課啦!』」

今日,有報紙提及,有初中老師發現學生所交的功課字體跟平時有別,後來發現是家長代做。老師向家長了解,家長竟然發難表示:「佢攰丫嘛,一次半次嗟,幫仔女完成功課係家長責任,老師只係負責批改與追收功課,幫佢做左你咪唔駛追囉。」同時也提及,有學生是補習老師代做功課的。

我承認我實在脫節!我那年代,做功課莫講話搵人代做,就算係抄人地功課,一經發現,肯定大件事。家長更加唔會容許仔女搵人代做功課,因為,若果被發現,老師要見家長,同學又會話俾自己家長聽,家長之間就會傳開去。你被罰事小,老媽子面子事大嘛!

現今仔女功課由幼稚園開始痴痴地線,家長覺得教仔女做功課仲辛苦過公司OT,於是把心一橫,目標為本,了結事情仔女有得玩我又有得抖,何樂而不為呢?

首先,希望各位家長明白,若果你仔女仍然願意做功課,覺得完成功課係學生責任,好在乎功課做得好唔好,老師會吸幾多個印仔的話,你為求一時之快既決定,會令到小朋友價值觀錯晒:究竟我應唔應該向老師坦白,呢份功課係媽咪寫呢?但係竟然又有三個印仔,好威威播!

慢慢地,仔女就覺得,完成功課不是學生的責任,因為「家有慈母真的好,功課俾晒我老母」,惰性,是這樣煉成的。學壞比學好容易,學壞左,要番轉頭,好難。

同樣道理,當學校要求學生交出實質係玩死父母既勞作,迫父母自行攪掂叫個仔女去訓,當然的學習意義已經蕩然無存。不過,仍然有學校樂於不設實際地要求年幼學生製造飛機大炮,結果都係搵著父母黎攪。

無人會否認於香港唸書是辛苦的,不過,你既然生得佢出,麻煩至少你都唔好教壞佢。願意學習願意上進是無得迫的,若果你仔女有一團學習的熱火,先唔好講會唔會哉培,但請切勿撲滅他對學習的熱忱。

沒有留言:

發佈留言