2015年3月27日星期五

金裝齡記麻辣火鍋

介紹此店有點矛盾:此店幕前老闆有舒淇,劉偉強與及,王姓超愛國導演。此人近年發表之言論令人作嘔之餘實在非筆墨能形容,不過此店無論質素與價錢實在不能不向大家介紹。

位於荃灣的金裝齡記,應該開張數個月,價錢是成人HK$148任食任飲兩粒半鐘。是的,任食任飲不一定正,但根據光顧經驗,與及同行有朋友已經第二次去,若果唔介紹,好似對你地唔住咁囉。




貼呢張係咪舒服好多?
裝修光猛唔似火鍋店,特別讚就係座椅可以拉起放隨身物品,可以減少衣物索盡火鍋味。好,任食,究竟有乜呢?
未講食物之前,我想先講講任飲:
有眼見,汽水選擇有,連Jolly Sandy都任飲。另外有酸梅湯,竹蔗水,無記錯仲有咖啡茶與及花茶,係,同台灣有得揮。
自己溝,好整齊整潔既。


我就無食薯條麥樂雞,青瓜同雲耳係好唔錯既;甜點呢,我就只食呢個水果,其他無乜試過,太飽。

此乃台灣麻辣,水準高,比起好多任食火鍋高出好多,而且係越食越辣果隻,真係好唔錯,特別食豬大腸豬皮牛筋等等,料好唔錯,牛筋入晒味,好食到痴線。
此乃同行朋友表示唔可以唔點既鴨血,佢地話上次黎放出面任囉,依家要點,都係免費。

食材呢,九成以上都非常對路,特別推介有1.牛滑,竟然有陳皮與馬蹄在內,淥完好有山竹牛肉Feel;2.牛筋豬腸豬皮鵝腸,你食麻辣你就一定明;3.水餃雲吞,大大粒好多料;4.花膠仔,充滿骨膠原咁囉5. 牛舌,上檯其貌不揚但出奇地好食。

另外有兩款食物要特別介紹:

手切牛,非非非常有趣:第一二次Order,要催,之後呢,每個Order黎都比上一次靚,仲要唔同你慳。食過一次既朋友,話上一次都有此情況,肥牛越來越靚,無呃你,睇相就知。

是日海鮮推介:當日第一Round係蠔,質素已經比好多舖頭好,食食下轉呢個蜆,鮮甜肥美大隻無沙,自製呢個清湯粉絲,真係好好好掂呀!

當日星期五係唔爆場既,唔知係咪因為王大導原故。都係果句,以質素與價錢,無理由唔食;若果睇王生唔順眼,當我無介紹過。

沒有留言:

發佈留言