從網頁介紹這飯店的設計是走簡約路線，傢具是Philippe Starck的設計，雖然位置距捷運站有五至十分鐘路程，但台北的士幾咁抵，與及，你睇埋我下面介紹，你就自然明白，我點解決定下次都揀佢：
房間夠大，白色夠簡約，床夠大張，呢兩晚令我睡得幾好。
LCD電視，有Hi-Fi（仲跟一隻New Age CD俾你播，不過唔俾囉走），仲有DVD機。電視乜台都有，最最得人驚係Video-On-Demand唔駛錢，係，套套都唔駛錢，連「十八上」都全部唔駛錢。
衣櫃仲有夾萬，非常周到。
玻璃門一道之後就係洗手間，你有眼見，四枝包括沐浴露洗頭水護髮素與及潤膚霜都擺得型過人，仲有一件手製茉莉花肥皂；另一道玻璃門之後就係沐浴間，有兩款花灑，仲能夠望出睡房，勁！
酒店樓高十一層，我住八樓，景觀都不俗呀！
酒店每層都有三個Wi-Fi源，房中仲有Lan 線提供，唯一唔好就係電掣無國際化，呢樣差少少。
不如介紹另一強橫賣點，自助早餐：
多野食到呢．．．仲有白粥、海帶湯與及白飯，飲品咖啡茶之外有西柚汁與橙汁，鮮奶與豆漿，仲有粟米片提供，無得投訴啦！
最後要讚兩件事：原本三點先俾Check In，我Email通知佢地我班機好早到，我一點幾去到已經有房；另一件事：大堂有部Mac機俾大家上網，不過因為保安問題不能下載，因此我不能下載Boarding Pass，服務員立即幫忙，用佢地辦公電腦幫我攪掂！
所以，上網以呢個價錢訂房，實在超值，強烈推介！
沒有留言:
發佈留言