信得過又食得過

悠閒假期碰上另一已遞信好友Baby，相約食晏，佢揀左灣仔一間叫信得過既餐店，主打杏汁白肺湯。我無所謂，只係奇怪，點解好友Baby咁有興趣去食豬內臟呢？因為呢間舖主打呢樣野，同埋原汁原味無味精。

當日都勁凍，所以，當日食過果一餐，的確係暖入心，好味又滋潤：

 

因為本人都極愛豬肺湯，所以我點左杏汁白肺湯加讚歧手打烏冬，四十三元正。若果要埋花膠果隻豬肺湯就多二十蚊，若果選日本稻庭烏冬就加廿五蚊。

作為一個都幾幸福由細飲阿爸阿媽湯水大既我，一飲呢個豬肺湯就知道掂！鮮甜，杏汁味亦飲到，唔會淡亦唔會過濃！裡面既豬肺好乾淨滑溜，好好食！烏冬彈牙高水準，最重要烏冬個湯底係老雞湯，呢四十三蚊，好掂！

呢個係Baby點既正宗黃沙乳豬潤湯烏冬，湯係火瞳老雞湯，我試左一塊豬潤，我平時真係好怕食豬潤，但呢個，竟然係爽脆！嘩我喜歡到不得之了呀！

半隻招牌口水雞，辣度剛剛好又香口，雞呀，係滑溜溜有雞味，真係好高分數架！

呢個海蜇青瓜大件夾抵食，爽口彈牙！

老闆就係呢個星星哥，佢果日都有坐陣，我想話，信得過我一定再黎，因為有好多樣野未食！