2010年9月12日星期日

Novotel Citygate BBQ Poor徒Buffet

一直聽聞東涌Novotel的燒烤自助餐好掂,而且平靚正,所以不訂位休上Walk-in。今晚與兩名舊同學聚舊,終於第一次吃這Buffet,是位於Novotel Citygate三樓的BBQ Poolside Buffet,盛惠HK$179加一。

由於落狗S的關係,當然不能Poolside,於是室內食,師傅外面燒。



其實以此價錢食燒烤Buffet對於質素與食物選擇應該有心理準備,不如讓我慢慢介紹:
冷盤沒有壽司,只有三文魚刺身,另外就是以上的海藻,八爪魚,螺肉(以上三寶在Neway K buffet一定見),玉子豆腐,蕎麥麵、青口,翡翠螺。沙律選擇不多,而且並不出色。湯得一款意大利菜湯,我想大家樂應該好飲d。

熱葷方面,有兩隻烤腸,雞翼都不俗;疑似豬頸肉麻麻,不過都不及鴨胸難食;炒飯無試過,至出色都係有螺絲粉配上極濃Carbonara或肉醬醬汁,與及忌廉焗薯。不過我想話:最後呢兩味,好易整咋播!



未介紹燒烤食品之前,真係要講一件事:無人話你知你可能永遠唔知經餐廳出番升降機口行出泳池有得拿燒烤食物!不過有關服務方面陣間有單仲堅,轉頭再講。燒烤食物有牛扒豬扒青口羊架與及菠蘿。牛扒豬扒真係好麻麻,質素有如百佳醃製燒烤包;青口當然雪藏,唯一羊架與燒菠蘿好食。另外,期間見師傳烤大蝦與露筍,佢會話你知:「自助餐無架,呢D 係 À La Carte。」哦!之後佢走入黎逐檯話:「有龍蝦仔呀,一轉架咋!」我見成班人擁出去,而且龍蝦仔都係少食為妙,三來龍蝦仔咁烤唔多好食,放棄!


甜品合格,有幾款雪糕,有楊枝金露,有幾款糕點,有生果。

好,介紹有關啤酒的故事:

同學A:「有乜野啤酒呀?」
侍應男:「有xx,yy與及青島,四十五蚊一杯。」
同學A:「咁要青島。」

一會之後,侍應男:「先生唔好意思,青島一枝四十四,一Pit就廿八,你要邊款呢?」
同學A:「乜野係一Pit?」
侍應男:「Ai...即係一杯。」
同學A:「咁係唔係生啤?」
侍應男:「先生唔好意思,我唔清楚乜野係生啤。」

幾隻烏鴉在我們頭頂飛過。

同學A:「咁你搵個識乜野係生啤既過黎。」

不消一會,一名應該超過中女級數的侍應女前來:「唔好意思,果位係暑期工。杯裝青島係生啤黎。」
同學A:「咁要一杯。」

兩三分鐘後,一名疑似經理前來,說:「唔好意思,我怕我同事攪錯,先生係咪要一杯青島?」
同學A:「係,但係唔係生啤?」
經理:「青島我地無生啤架先生,我地有xx,ss與及Hoegaarden有生啤,都係四十五蚊杯。」

又有幾隻烏鴉在頭頂飛過....

同學A:「咁我地要兩杯Hoegaarden。」

後來,同學C做了個實驗:叫侍應女要多一杯一模一樣,結果,好彩,都係Hoegaarden。

話雖此餐一七九加一,但山長水遠交通費都有番咁上下,食物質素如此你話值唔值都見人見志,不過呢,今晚同學聚舊實在好歡樂,同乜人食飯有時比食物更重要,但下次我諗要揀第二間喇。

沒有留言:

發佈留言