收費電視一二三

同學們到我家竹戰，其中一個問：「你又有有線又有Now，乜台都齊呀？」「當然唔係啦！」「咁你睇唔睇得晒架？」「點先叫睇得晒先？」

我承認一個人住但安裝那麼多收費電視台的確有點奢侈，不過我這樣想：不是花不起，我又沒有其他豪花的嗜好，而且太喜愛看電視，給自己多一點選擇，也不為過啊！這篇想寫最近關於收費電視的三件事：

About Now
看英超的朋友都或許有安裝Now TV吧！我有，而且我早在兩年前多也替爸爸那邊安裝了。我這邊是較早選用的，所以超強體育組合加無線收費台再加亞洲美食台，三百蚊左右；爸爸那邊就貴了，只是一個超強體育組合連高清盒就要二百六十元。英超沒有了，約將要在十月滿，有點事可以做的。

著實我覺得Now的體育頻道做得不錯，而且多元化，就算沒有英超我也想看網球排球，而爸爸那邊呢？他太愛桌球，Now有一個台可以讓他看個夠，所以，我沒有打算Cut，他，其實也不想。

十月約滿，七月尾致電，有個選擇叫合約事宜的東東，接通之後，了解一下，噢，我這邊可以一減減到差不多兩百，而爸爸那邊呢？260減至128加12蚊租機，若果再選購三個其他台至總月費150就免租機費，而且選台可以買一送一，選一個平送一個貴，結果，選了幾個有兒童又有電影，月費為160元，每邊慳一百，而且小姪女最開心，有Disney Channel與及Baby TV，以後就可以乖乖跟著爺爺看電視，又或者，與爺爺爭電視。

還有約的朋友可以打去問問，無謂俾咁貴啦！

About Cable
有線，四月約滿，續約時他又Sell我一些貴到爆的Plan，我乾脆跟他說：「我淨係要睇番依家有既台，我唔要高清，你一次過講個最平既俾我算喇。」結果月費259，照睇世界盃，那位人兄教我不用當時裝英超，到八月才加也不遲。

今天致電，詢問有關加英超的事，那位小姐竟然說：「依家要高清英超最平398。」「唔係播！你地同事果陣同我講續約，話八月加番都係每個月五十高清八十播！」「呢個優惠過左喇！」「咁你地同事當時又咁同我講？」

可能又俾我兇了一野，那小姐說：「咁我幫你問下可唔可以批番呢個俾你啦。」徙時間！根本就有，搏大霧想屈我俾貴ｄ？無咁易。

結果，俾多五十有英超，只係廿四個月約由八月再生效，但八月到十二月又唔駛我俾多五十，即係只係二十個月俾多五十，計埋Now，都慳左。

About TVB PayTV
講無線收費電視台有乜好過？係講呢排成日睇開乜。

最近經典台係我時常收睇既電視台，因為重播兩個劇，真係好喜歡。首先係孖仔孖心肝，周星馳加劉青雲，呢套劇真係好好笑，梁家仁又非常攪笑，對白又有時半爆肚。想起呢套劇諗起兩件事：一．當年曾經係上環見過劉青雲拍呢套劇，真人有型好多！二．因為呢套劇認識Time in a bottle呢隻歌，好喜歡！

另一套，真係多得佢唔少！大時代！

經典台每逢星期六晚十二點半連播五集，依家已經播左十五集！頭五集我真係頂到第四集就不支昏睡，之後發現星期一至五晚十二點會逐集重播，多好！呢套劇當年睇唔會明晒，都咁鍾意，依家睇識多左好多野，就更好睇喇！當年藍潔瑛實在靚爆鏡，周慧敏、李麗珍與楊羚都好靚，而且好戲之人太多，我只可以話劉松仁頭六集演出已經夠囉乜鬼視帝喇！另外發現，原來當年唐寧已經有份拍，扮劉松仁二女。韋家輝呢套真係經典，依家睇左十五集真係欲罷不能，呢排睇睇下諗：當年劉青雲因為呢套戲識左個老婆郭靄明，但佢係呢套戲入面神經質到咁，劉青雲一定係欣賞到港姐冠軍既其他優點喇，唔係同劇咁多靚女，點解揀佢呢可？

最後推介：今晚起音樂台十點半重播勁歌季選，今晚睇完一九八三年第一季季選，主持係Ken蔡，曾慶瑜，陳玉蓮與及朝偉哥，節目並不是Live而係錄影播MV，第一季十首歌包括：梅艷芳赤的疑惑、徐小鳳隨想曲、王綺嘉湯正川尋知己、汪明荃萬水千山總是情、鄭少秋黃帝子孫、陳百強今宵多珍重、蔡楓華何必曾相識、林子祥海市蜃樓與及羅記兩首：激光中、願望就是明天。我呢類音樂精，以上歌曲都有一兩首唔識，但睇番MV真係勁高興，羅記激光中個MV真係正到爆！

係囉，講到呢度，你地信我係電視迷啦可。