喪食東京遊之大魚大肉（上）

呢次主題係食，係咁食不停食，當中有平有貴，呢兩篇係介紹兩餐至勁至貴，與Title亦非常配合：真係大魚大肉。

上半場先介紹係呢個雞泡魚宴，店舖名玄品ふぐ，雞泡魚專門店，我食果間係池袋店，多謝飯糰生訂左位，更好彩係一入到去，有一名識國語既侍應－－因為呢位嬸嬸係上海人。


基本上呢個Menu有既野都食晒，但係梗係睇睇我相片介紹啦：

呢個前菜，係雞泡魚皮混酸汁，好開胃。雞泡魚皮既Texture好得意，非常多骨膠原，呢個前菜好好食。

刺身有厚切薄切兩種，厚切以一塊椰菜夾住食，兩種食法加上沖繩柑吉汁，係好好好好味！清甜！我個人喜歡厚切！

呢個係炸物，個炸漿好薄，咸香鮮味，另外既小辣椒同粟米都好好食。

白子料理，即係雞泡魚卵，可以選擇鹽燒與及醬油燒，我揀左鹽燒。果種好食法都唔知點形容，入口唔腥但有海水味，哈，我又挑戰個人食野極限。

呢個用炭爐燒雞泡魚腩與及魚皮，有醬油與及醋汁兩種食法，侍應用心教我地點食，嗯，原來雞泡魚腩咁鬼好食，唔怪得知有人為食佢而瓜左啦！但我更欣賞係魚皮呀！至於兩隻醬汁，我覺得醋汁好食過醬油！

紙火鍋呀！呢個酸汁非常重要，令到所有食材都好好食，不過咪以為咁就完播，呢個湯，仲有用途！

仲有泡飯食，死未！雖然個人覺得尚興泡飯好食ｄ，但呢個好清甜鮮味，一樣有其正斗之處！

最後呢個花生味雪糕，未食過架，好清甜，令整餐非常完美。

呢餐幾錢？加埋杯生啤，位位唔駛八千Yen囉，呢個飲食經歷值得架，雞泡魚，唔係有幾多機會咁食法架！