世界盃之廣告

世界盃睇得高興嘛？賽果當然有好多驚喜，不過最驚喜都係球證質素之差！放心，我並不打算講波，想講係唔睇波既都可能搭到咀既事。

小弟收看有線世界盃，不過長期支持球彩台，因為好笑之餘兼夾好似置身茶餐廳，就算萬一場波悶悶地，總會有笑料醒一醒。球賽以外，有線世界盃期間播既廣告，又有不少有趣地方可以談談：

UA財務兩個廣告，首先講講機場旅行篇：男女主角揀得極好，女的極度港女完全顯示我駛男友錢係應份，就算佢要向財務公司借都關人隱事，男的一副心甘命抵死蠢樣又係極正，果位女職員可能心諗：你咁既質素都有水魚上釣，我做UA做乜呢？

另一個Boutique篇，完全唔Make Sense：男主腳好愁睇銀簽咭單，女主腳繼續買買買，但唔知典解佢話：全靠佢教我用UA咭數餐餐清，咁，究竟邊個唔掂要搵UA呢？典解男主腳咁愁望銀包，轉頭又話乜事都無呢？至於『慳左既息夠我買多件衫』，傻啦，此等購物狂，根本唔會諗自己夠唔夠錢，至要買，不用理。

白花油，呢個Go Go廣告我除左用騎呢之外，真係搵唔到乜野形容詞，不過肯定好洗腦：因為姪女依家會跟住佢Go Go，Oh No！

Neway睇波果個我幾喜歡：係，女主腳係野蠻女友，但短短幾個鏡頭已經表達男友又要陪女訓又要睇波又怕嘈醒佢，所以，乖乖地同班Friend去K睇咪好地地囉！最後呢個女友Enjoy埋一份，雖然與事實不乎，但不失為一個童話式結局。

果隻美國礦泉水廣告呢，其實我唔係幾明：我有睇沈旭輝談世界盃，佢話美國人好自豪自己有美式足球，所以一路都唔多重視足球。唔知係咪咁，整個咁既廣告出黎，九唔搭八。

Nike兩個球星廣告，個人覺得C朗果個麻麻地：射射下罰球變左銅像，都幾大吉利是；朗尼果個好正，成個故仔，仲搵法國兵客串幾角，成件事真係好民族英雄而且攪笑，當佢攬英女皇果一刻。不過，整個廣告既當事人今年都廢到無輪，唔知朗尼或者列貝利睇到呢個廣告有乜感想呢可？

竟然忘記了！呢個澳門凱旋門，好彩係我工作上知道呢間係酒店，如果齋睇呢個廣告，我會以為呢個係大富豪夜緦會！果班洋妞可以用『煙視媚行』形容，至慘係俾人既感覺唔係誘惑，而係個個好似搵食咁款，再加上拍攝色調舊舊地，與及果位疑似人妖版張惠妹既洋妞向你單眼，最後整個老翻Lady Gaga完事，嗯，尋花問柳者，完全收到知道晒！

壓軸一定要提卡士蘭：任達華哥哥與琦琦姐姐呢個Work Hard Play Hard，本來無乜野，只不過呢個廣告近排將佢地出席記招片段剪落去，琦琦姐姐果句真係好勁：「我平時食野好唔健康，好鍾意食零食，例如打邊爐啦，大閘蟹咁。」

唔知佢邊度鄉下，打邊爐同大閘蟹變左零食，可能佢唔係要食卡士蘭補肝，而係要補補個腦。

希望餘下賽事真真正正做到Fair Play，Anyway，連FIFA個網對於尋晚英格蘭果球世紀誤判輕輕帶過唔放入Highlight，Fair Play？發夢無咁早，訓啦，如果你真係想睇巴西的話。