2017年10月17日星期二

台北食極都有:開飯川食堂

自從台北其中一位好友改吃素,我與其吃飯地點都會交由佢選擇,不過好彩,佢只係唔食肉,與肉一齊煮既佢都會食。今次見面,我提議開飯川飯堂(都係朋友介紹啦),佢話好,因為好食好多野佢食得,於是就訂檯。

開飯川飯堂台北都有好幾間,今次選在京站,六點半入座。吃過之後,覺得此店之辛香麻辣都做得不錯,價錢非常實惠,若果可以多幾個朋友一齊食,就非常歡樂喇。

坐低,未點菜,侍應首先奉上一瓶蔓越莓果醋,天氣熱,飲呢個非常開胃,免費提供:
此店另一特色就係菜名改得好有趣,以下呢個叫川小三(兩隻辣椒辣度):
蓮藕微辣,右邊柚子蜜白蘿蔔爽甜清新,中間川辣雲耳堅辣惹味,喜歡到不得了。
朋友指定要點的老皮嫩肉,乃炸嫩豆腐,技巧高在炸至微微金黃色,固定型狀,內裡嫩滑好味,配上川汁,難怪一定要點。
這個更加一定要點!黃金美人腿乃咸蛋黃炒筊白筍,好好食呀!咸蛋蓉沾滿爽甜筊白筍,不油膩而非常好送飯,實在無理由唔食呢個囉!
講到飯,是人頭計NT$20一位,整個鐵鍋上,無限任添(當然唔能夠食唔晒外帶白飯啦),你知嘛,有D食物,唔送飯真係好對唔住自己架!
例如呢個五更腸旺啦!肥腸加鴨血,個汁非常惹味好送飯,我就食葷朋友就囉汁黎送飯或者配其他食物,不得了!
另外點了一個唔刺激既湯水,連鍋湯,用上豬骨餚湯配上五花腩肉,白蘿蔔與胡椒粒,清甜好飲,我叫朋友打包番屋企!

眼見附近食客點好多我好想食既野,無架喇,下次一定會再食呢間囉!成餐咁樣樣,千四台幣多少少。

仲未走?介紹間好野俾你:
知道呢間舖好耐,白鬍子,終於光顧,係咁既,一路聽到佢地既威士忌蜂蜜冰淇淋好得,今次終於食到!
酒香好足亦帶有蜂蜜香,啖啖都令人回味,只係NT$90咋!

沒有留言:

發佈留言