Sunday, July 2, 2017

台北繼續食:客家菜與素點心

其實大家見我慢慢寫就知我未咁快再飛,不過下年或者七一都係出一出國好,無眼睇。今次去台北食左好幾間未食過既,而且都係當地人介紹。

今次介紹一家客家菜館,平民價又好食;另一家據知平日午市晚市無訂位都好難食到既素點心店,當地朋友表示,唔好淨係識食舒果喇!

首先介紹位於中山區客家菜館六堆伙房(其實我當時望左好耐估係呢個名,你望下門口點寫):
先來介紹兩碟小菜:
後面果碟:胡麻龍鬚菜,龍鬚菜其實係佛手瓜苗鬚,非常有益,熱量低,膳食纖維高,而且有降血糖功用,我就未係香港食過。以胡麻醬拌吃,此冷盤幾好食,菜讓我想起蕃薯葉;前面呢碟係紫蘇南瓜,用以紫蘇梅醃製,非常開胃!
我點了一碗酸菜魚片麵,一般啦,湯清甜但沒有太大驚喜;反而同事點並一定要我試既芋頭米粉湯,啊!芋頭的甜完全煮進湯,每一啖都回味無窮!
同事另點:金沙豆腐,即係咸蛋炒豆腐啦!好神奇,入味香口但不油膩,豆腐依然嫩滑,而且豆腐每件都輕輕煎過,送飯一流呀!至於呢杯又係好好飲:柚香酸柑茶,當日熱到乜,呢杯清甜醒神!
三星蔥油餅,三星蔥都唔駛點介紹,而且煎得香不油膩蔥超多,就算飽都要食!
呢個大堆!炸仙草!將鮮草冰硬再點上麵包糠去炸,淋上糖漿,小心熱爆咀,真係勁掂,又軟又脆又香口,等廿分鐘係值得既!

咁食法,都係千一台幣左右,誠意推介!

好,然後介紹呢間叫養心茶樓,係專做素點心,點解會黎食呢?某日與工作夥伴出去開會,行經此處佢地問我食過未?我話未,佢地就話咁一陣落黎下午茶,因為除左下午茶無訂真係唔駛旨意食!
素叉燒酥,其實睇張相都見到,個酥皮做左幾多層!點心做得非常精緻,配上蕃茄叉燒醬及素叉燒餡,一咬,呵呵呵,掂呀!
芝士焗白菜!喂做得好掂,首先芝士香濃,白菜加上蘑菇鮮甜嫩滑,難怪旁邊好幾檯都有點(其實我地都係望人地叫乜黎點)。
素蘿蔔糕又有乜好介紹?首先我當時一食,呵呵,滿滿蘿蔔而唔係一口粉我已經知足料喇!絕無味精(其他菜都無),單單靠白蘿蔔鮮蕈菇已經好好味,而由於蘿蔔多,所以好多汁!再上官網望望,佢地用高雄特製現磨在來米粉,我唔識啦,但的確係好高水平既素蘿蔔糕!
野菇時蔬豆漿鍋,選用有機豆漿加上新鮮蔬菜,鮮甜到唔知講乜,湯頭煲耐少少勁甜,難怪隔離左右都點!原來湯係可以無限添加,不過你都見啦,其實,三個人,下午茶呢個陣容,好過份。
甜點,第一個叫焦糖冰心塔,凍既,驚喜不大;反而另一道杏仁豆腐,鮮杏仁汁,配上豆花鮮果,無得彈呀!

喂呢間原來可以用app訂檯,可以成班人一齊去食清d。



No comments:

Post a Comment