2017年6月17日星期六

為何A Life深愛的人可以這麼不濟

雖說沒有期望沒有失望,早前錄下兩部日劇,一部是竹野內豐的無敵律師,頭幾集實在很麻麻,後段好少少,整體全靠演員救番,但都不算好看至少不會悶。然後最近終於看木村拓哉的A Life深愛的人,啊!一直看一直看,無高潮無起伏悶到一個點。

其實又幾難想像一部有木村拓哉,淺野忠信,竹內結子,松山研一的日劇,時裝劇講醫生,基本上要拍得悶比拍得好更難:我就拿米倉涼子的Doctor X,最新近一季已經重覆又重覆,不過勝在角色性格明顯而且節奏快,就算身旁的配角輪流有事,或者每一兩集醫一個人,起碼目標鮮明不貪心,百貨百客觀眾不會投訴。但當你希望走劇情路線,希望有點深度,那麼劇本不濟成件事可以好難睇。


劇情是這樣的:木村拓哉飾演的沖田一光自小跟好友壯大(淺野忠信)一同唸書打球也考進醫科,一光不及壯大聰明,而他們在同一家醫院工作,院長女兒深冬(竹內結子)曾經跟一光相戀,但一光後來被推薦到西雅圖深造,最後深冬跟壯大結婚而壯大也成為醫院的副院長。當深冬的父親即醫院院長患上嚴重心臟病,他堅持要一光回來醫治他,因此一光再次回到該醫院,他救了院長之餘,因為壯大告知深冬患上難以醫治的腦腫瘤,壯大不能替家人做手術(他是腦外科專家),希望一光可以留下救深冬。

劇集希望寫醫生面對的矛盾,包括單純救治病人之餘也要面對如何經營醫生,當中也有一些利益關係,例如前輩醫生醫療失誤又要賣人情之類。不過,以上所講的,劇集都涉及得唔湯唔水。

副院長壯大面對醫院財政壓力,要跟院長對著幹希望取消兒科,奈何太太是兒科的;他又嘗試跟不同醫院合作,希望令銀行繼續支持;最後是很容易的為一位政客做了一個日本未試過的手術,一切解決了。十集劇集裡,他猶疑不決,改變兒戲,別說菜菜緒飾演與他偷情的醫院法律顧問頂佢唔順,我地睇既都覺得佢智力應該有問題。

不過劇集中大部份主角智力都有問題的:不如說到竹內結子的角色吧!既然已經嫁為人婦也有女兒,我又看不到他是希望跟一光再續前緣,但他會問一些「你以前點解咁咁咁」的問題;另外,我相信最神奇,應該是醫院容許一個隨時腦Cancer發作的醫生繼續替病人診証與做手術,他覺得自己不適但從來沒想過要去了解或者會不會影響病人(後來當然有啦),後期知道自己可能會死,竟然不是跟老公訴說恐懼,山長水遠走番醫院係舊情人面前爆喊崩潰,我都看到快崩潰。

主角呢?哈哈,跟父親的關係好像有點戲好演,其他的,我見得最多就係佢係房研究深冬的病怎醫。呢間醫院好有趣,醫生毫無私隱概念,日日將深冬腦掃描當Wallpaper放Notebook,部腦又無password係人行過掂到都見呢張Wallpaper,喂大佬,點架呢!

所以,木村拓哉其實無乜戲好演,戲中表情都係果一兩個,最最最多係發現救深冬方法流左兩滴眼淚,與及救老豆果陣比較有情緒起伏,其餘時間猶如世外高人與其他人沒有情緒交流。

呀有,光一最最最欣賞的護士(亦是本人覺得全劇算最亮眼的木村文乃),角色性格鮮明爽快,無論對副院長對一光或者果個富二代醫生井川(松山研一)都非常搶鏡,可惜後半基本上無戲可演,主要安排佢跟井川傾下計行下街等井川當下兵。

講到井川,哈,新醫生,遲早要番父親醫院承繼醫院,覺得自己好勁,面對一光呢位高人活像一個智障,後來好像成長了,但我又唔明呢位醫生仔憑乜野對於一光有關深冬的醫治問長問短表達意見,整個角色跟劇集內大部份角色一樣,低低地。

其實最好表現的主角是淺野忠信,因為壯大這個角色比較多內心矛盾:愛太太,但因為外父唔喜歡佢有d報復心態而跟人偷情;一光一直比自己遜色,回日後好像樣樣比自己強,連外父都可能將醫院交給他,但又需要一光去救太太,所以淺野忠信其實交足戲,只不過劇情低低地,你無啦啦話合併,無啦啦又唔合喇播,然後又話炒個護士果頭先唔炒之類,明晒,典解銀行會唔想再借錢俾呢間醫院。

睇完十集(特別大結局),有一種「頂你完全浪費時間」的感覺:一直以為及川光博演的羽村醫生會跟菜菜緒有乜大陰謀,丫原來就係爆壯大想將醫院毀掉然後阿院長就話要炒佢,跟住當然要壯大跟一光合作救活深冬啦,然後就一切回復正常,差在未有一齊圍住BBQ。

難怪唔收得,難怪被人話有咁強卡士都係浪費啦。

沒有留言:

發佈留言