2017年3月31日星期五

十五樓的牛牛

當年第一次在台灣吃馬辣,吃到飽,湯底靚,好幾款肉逐盤上,其他食物雖然為雪藏貨也不差,飲品任飲選擇多,白飯雞蛋調味料任添,甜品水果任食,雪糕還是哈根大師Movenpick多款,最重要是價錢抵到爛無得彈。後來,當越來越多遊客,特別是大大聲乜都爭的香港人,馬辣水準下跌,我再也沒有去了(當然,吃得好一點也是原因。)

然後,在最近搬文過程中,發現六年前吃旺角小肥羊任食落樓都要兩舊水都大叫好正,早幾天同樣是旺角,位於創興中心十五樓的牛牛台式鴛鴦火鍋,兩小時任食,水準之高價錢之平是完全以為自己發夢:竟然在2017年的香港,我吃到如此高質的自助火鍋,價錢比2011年的小肥羊還要便宜!



先看看環境:店是新開的,非常企理而且不會迫,當然通風可以做得好一點,但座位是很不錯,而且那個尚朋堂電爐,火力很猛,檯頭更放了一壺清湯,方便到連叫侍應添湯都不用,當然要麻辣湯,還是可以要求的。

嗯,Wifi比較不濟是事實。

好,吃呢吃呢?八款湯底,可選兩款併鴛鴦鍋,湯底不另收費,有海底撈麻辣,胡椒豬肚,沙嗲,芫西皮蛋,杏汁,臭豆腐,台式辣蕃薯及酸菜白肉。當晚選了海底撈麻辣及胡椒豬肚:
麻辣很堅——在香港可以吃到又麻又香又自助鍋湯底不多,這個很不錯,而且的確火燒後欄;胡椒豬肚湯底都不錯,我飲過,不是隨便的,味道應有則有。

有好幾款食物是要剔紙仔的:三款牛(牛梅花牛小排黑毛牛),黑毛豬,羊肉,還有幾款海鮮:蝦,蜆,八爪魚脆肉鯇等等,海鮮選擇不多但水準不錯,肉就更加是!

的確企理啊!是嗎!

鏡頭一轉看看調味料吧:
十幾款乜都有又乾淨播!

其他食物呢?


四大排,講得出都有,食物水準絕對收貨:

係呀每人囉番自己隻碟出去夾就得架喇!

飲品,又係齊到離譜,除左有熱飲呀花茶呀之類之外,有罐裝汽水果汁啤酒,仲有沙冰,又有竹蔗水酸梅湯之類之類:
啤酒都三款呀老細!

雪糕,除左有Dreyers之外,仲有雪條同雪米磁,我就眼見隔離檯晨咁早係度食大腳八雪條!

未講完,仲有成個西式甜品櫃!

我食左三樣,水準拍得住酒店,無投訴!

當然仲有白飯啦,同埋好似疑似一大煲咖喱魚旦。

係咪好吸引先?我諗知道埋價錢更加吸引:首先,免加一已經離譜,價錢係,平日,成人,每位HK$158,係,真係港幣一百五十八蚊,無隱藏收費,若果你癲少少,九點半後入座,HK$138,十一點半後入座,HK$128。星期五六日公眾假期前夕,以上價錢加十蚊,係咪痴線係咪離晒譜!

因為咁,我先咁急通知大家,請記得訂位訂位訂位,與及,十五樓既牛牛,要食趁手!

沒有留言:

發佈留言