2016年8月21日星期日

三個麻甩遊台北:微風建一食堂+我在台北配眼鏡

一齊去旅行另一要注意地方就係:攪清楚大家想食乜之餘就係大家筆直如何?你覺得呢個價錢好正常,朋友或者覺得太貴。所以點解我預先問定有關可能比較貴既餐廳,各位團友意見如何。

日式無菜單料理上一次去台北食過兩間,選擇微風建一食堂,因為價錢比較親民,所以預先講定:菜單有台幣一千,千五或二千,大家同意就去馬訂檯。好彩早一個星期訂,先至能夠訂到星期六第二檔,即八點鐘。


到達,店外滿是等食既食客。上次都略略介紹微風建一食堂乃一間日式居酒屋,座位不多。滿以為會被安排坐於師傅前,點知入左去裡面,後來發現係好既,因為三個人坐得舒舒服服,雖然旁邊係一班之前係門口等已經煲煙煲得好勁既台妹。

居酒屋無菜單料理並非正統日式Omakase,所以,有時並非一人份出現。我地一致每人都點二千既,即係差唔多五百港紙,食左乜呢?


失憶症比較嚴重,只記得(由左至右)蛋卷包住鰻魚,烤河豚乾,秋葵沙律。
每人一條烤紅鮋,岩岩好離肉,我又一次完成係香港應該點都唔會做既事,食晒條魚。
刺身陣容鼎盛:生蠔鮑魚帶子甜蝦小卷油甘魚吞拿魚仲有兩三種魚咁啦,鮮味無得彈。仲有每人一份既:
海膽!底下以豆漿腐皮墊住,果塊金箔,係咪高貴左?
又見佢喇!烤白筍配美乃滋!
一人半隻明太子海膽醬燒龍蝦!仲有果隻鉗,一邊食,一邊話:「死喇今次番去真係超晒標。」
不按牌理出牌之無啦啦隊碗鰻魚飯俾你,果份鰻魚真係好肥美,你飽?都會繼續食。
蜆蜆蜆蜆蜆好多蜆既味噌湯。

話說一開波叫我地揀和牛定係西冷,我就揀和牛,去到最後竟然燒一份俾你!入口即化充滿牛油香,完滿到不得了呀!
(係我地早兩道菜已經問過侍應:仲有無?)終於到甜品喇!濃濃煎茶雪糕咁囉。

再次重申此店之無菜單料理比較台灣地道,但CP值無話可說地高,而且料靚呀!記住,要訂位要訂位要訂位,係面書同佢地聯絡亦可。


咦仲未走?是咁的,最後一個下午飲飽食醉又未捨得搭車走,於是西門町閒逛,突然發現有一家叫Owndays既眼鏡店,聲稱20分鐘可取鏡,鏡框到某個價錢仲送鏡片,咁點都入去睇下啦!
日本公司,自家設計鏡框,鏡片抗UV、防汙鍍膜薄型非球面優質鏡片,原來全球開左好多間——不過香港無。鏡框價錢有平有貴,咁大家都有印象,我頭大配眼鏡係有難度,又難得店員真係介紹左一款俾我係岩我戴架播:Eco2XY系列,使用樹脂材質,又輕又軟身,臉部接觸部分採用無金屬材質設計,而且聲稱降低製造鏡框時所產生的污染氣體。
每副幾錢?NTD2,490,戴上去好舒服,同學仔都話順眼,咁又check過我近視散光度數可以廿分鐘有貨交,當然配啦,六舊水左右一副眼鏡,仲要連鏡片仲要日本製,邊度搵先!
根據官網台灣啦星加坡啦泰國啦澳洲馬來西亞都有分店,若果行過咪去望下囉,你知啦呢個價錢,配黎靚都抵呀!

咁今次三個麻甩去台北就告一段落喇。

沒有留言:

發佈留言