2014年10月15日星期三

法國印象:巴黎自由行(四)

上集講到,人在巴黎但心在英超,偏偏愛隊當日打早場。曾經有諗過發神經番Apartment睇波但又覺得實在離晒大譜浪費坐十幾個小時飛機的痛苦果來法國,於是,打算放棄。

不過之前一晚突然諗起:丫唔知有冇酒吧有波睇呢?於是就上網Search: Watching English Premier League Paris,又真係俾我搵到有人介紹巴黎有兩間酒吧有波播!我非常穩陣再上該酒吧網站一看,確定有直播,於是,食完漢堡包,去左呢間
The Frog & Rosbif喇!




係,酒吧只有兩部咁既大小電視直播,在日光日白下午兩點半睇英超真係未試過,全場應該有十名球迷,都企我果邊,所以由興奮睇到鴉著無聲。另外,酒吧又有一家大細開餐,即係有bb喊咁啦,啤酒絕對唔貴,六十幾港紙一大杯,合理價錢。假若閣下有幸去巴黎又真係咁想去吧睇波,呢間,唔錯。

然後去到盧森堡公園,正在搵入口見有人排隊又去排,結果好好彩,標個尾會--呢個周末一年一度開放政府建築物,我就有機會入去
Palais du Luxembourg參觀,即係,法國國會大樓。

金碧輝煌華麗堂煌,入到去真係除左嘩嘩嘩之外,以為自己去左果個年代。而且,一定要讚,當局安排整個Tour好細心,跟住行,唔識聽法文都好,你肯定會睇晒你要睇既野。





呢個圖書館架唔架勢?裡面,唔止一個!下一個景點:國會會議廳,嘩!



專人講解,著晒制服,好有型架!
準備進入喪高貴有氣勢既大廳!


內園景又如何呢?
呢位職員好好人架,班姨姨問佢把劍堅定流,佢直頭拔劍!我仲有同佢合照添!

其他地方又放幾張啦!



真係係度開會架!參觀完畢,出左公園。佢地係大草皮邊放左好多椅,大家就非常悠閒咁坐係度,望天,望植物,咁就一世。

行餐飽,要開飯喇!朋友介紹,去食呢個法國生蠔!你知嘛,香港食法國蠔,真係幾貴,呢餐,所以好抵:
此小店全店只有五,六張檯,我六點半到達,有位坐,而非常有趣,背後左邊都係兩對港人情侶,另外有一對韓國情侶。問題:你估港女定韓女講野嘈D呢?



六隻Fine de Claires No.3,六隻Speciales de Claires No.3,一杯Sancerre白酒,一杯咖啡,Euro35,好鮮甜充滿海洋的感覺,極度滿足啊!

時間尚早,由於前一晚香港報紙話,情人橋果度唔俾再放鎖,咁當然要去望下啦!



仲有得買鎖掛丫,不過又真係有部份鐵絲網爛爛地咁囉。景色,無野講咁浪漫。最後行番地鐵站,又途經羅浮宮,俾個夜景大家睇睇:


浪漫到死,Will you remember me?

果打蠔,當然唔夠飽。一心諗住番到La Defense點都有野食,到達時差不多九點,出事喇:Mark & Spencer閂左,超市閂左,剩番就閂既老麥,殺入去買個雙牛芝堡餐,成七十蚊港紙,真係。。。

是的,巴黎呀,好多餐廳呢,星期日,係唔開門,好有型的。兩天自由行完結,是次行程最後一集:巴黎鄉郊之旅。

剛才條無聊問題,嗯,韓女講野真係好嘈的。 

沒有留言:

發佈留言