張學友的合唱歌

我有一些專門討論流行音樂的朋友，而他們有好些真的比我對於音樂及流行音樂的認識高很多很多。最近跟其中一位談起一個話題：學友的合唱歌，八成都好悶。

作為一個學友歌迷，我立時回答：係架，不過我會推介幾首。哈，既然有此話題，就即管回家後整理一下，然後寫一寫，睇睇你是否同意，八成悶歌。

說到張先生的合唱歌，大部份都是跟寶記女歌手合唱，而當中九成半都是，電視劇主題曲。第一首出現的學友電視劇合唱歌，乃呢首：

唔識？三十年前又唔奇既，霸王別姬乃電視劇楚河漢界插曲，合唱者，又係幾冷門：當年DJ夏妙然小姐。以歌論歌，此乃一首非常配合，而夏妙然亦唱得非常溫婉入戲。

之後？真係好幾首非時裝劇主題曲都得到張學友＋寶記女歌手，不如數悶果幾首先？湯寶如唱到依家都要唱既相思風雨中，當年咁喜歡既真情流露大碟當中最唔喜歡作品之一，或者係因為真係唱到爛；相同級數，有黎瑞恩既長流不息，絕對有理由相信係唱片公司有意製造另一首Ｋ場大熱，不過呢套同名電視劇就要提一提喇！中港日合作，周海媚加澤田研二，係咪勁先！

當年差不多人人有一首，周慧敏都得到一首留住秋色，電視劇叫如來神掌再戰江湖，歌唔差，不過當年玉女掌門人既唱功就，嗯。另外就要回味，當年寶麗金既卡啦ok MV，係唔係都咁拍法：

好型既Shirley都有一首！年少無情算係做得有心與及有氣勢既電視劇主題曲，當年Shirley仲係舊唱腔，成件事配合到架！不如睇下呢個當年電視劇片頭歌既片段啦！果d特技好正！

咁，當然仲有好聽既劇集歌，例如呢首，真係咁多年都覺得好聽。電視劇叫，賊公阿牛。呢首我係絕對唔介意落Ｋ再唱既！

另一首，與學友合唱常客，陳慧嫻，茶是故鄉濃主題曲：接近，乃高質而且兩人唱得有味道之餘仲好有意境。未聽過？

至於一對寂寞的心與及夜半輕私語，前者我一向普通，前段好聽，去到Chorus就唔係咁喜歡；後者，一般翻唱歌。

數完以上，寶系仲有一位，都同佢合唱過：菲姐。一直對於呢首非常夏日有個感覺，菲姐麻麻想唱，即係，Hae唱。但呢首歌，當年又真係紅到爆！mv留意係，菲姐跳得幾咁活潑！

其實寶記年代，有一首蒼海遺珠合唱歌：收錄於《Love & Obsession》大碟內，與當年一位名叫鄭穎賢女新人合唱，緣盡情未了。據聞原本諗住Plug，但呢位新人臨時解約，所以成為Side Track。搵到呢度有得試聽，呢隻係我非常喜歡一首學友合唱作品。

另外，雪狼湖當中都好多好歌，其中花與琴的流星真係非常喜歡，不過，至今依然覺得，當年學友與憶蓮現場版本，可一不可再，無懈可擊！說到憶蓮，日與夜，我最喜愛的合唱歌頭三甲。當年在電台第一次聽到果種Stunning，至今難忘。旋律之優美，歌詞如何將廣播劇男女主角的無奈表達，二人非常有戲的合唱，百聽不厭！

另一大家同樣非常喜歡，相愛很難。此曲難處乃兩人Key其實非常難夾，所以學友開首低八度Chorus高八度，而此曲最讓人回味，當然乃林夕的歌詞。

以上兩首皆陳輝陽作品！

還有一首與李玟合唱的從頭到尾，戒煙活動主題曲，是學友非常少唱R&B，亦可能好多朋友忽略一首好歌。

以上三首歌，張學友國語碟《他在那裡》有晒！

學友當然仲有合唱歌，男歌手對唱：陳奕迅兩首，你揀天下太平定同舟之情？嗯。Ｎ年前與李克勤先生有一首叫Oh No ，乃兩男合唱慣用話題：爭女。男男對唱廣東歌有兩首一定要介紹：

張學友ｘ葛民輝，老是一件令人回味的事，邊唱邊Rap，你聽過未？

至於呢首，唔知係學友玩歐丁玉，定應該話呢首歌被浪費左。張先生與御用監製歐丁玉合唱：煙花句。你話，呢首換上當年同公司既李克勤或者黃凱芹，件事會幾唔同呢。

我知我知，仲有國語歌嘛！甲乙丙丁與左右為難絕對好聽，而且耐聽，又點會悶呢？你最珍貴話晒都係經典男女對唱作品，本人亦在K唱過N次（唔通唱愛和承諾咩），不過數到係K唱得多，呢首放壓軸，當之無愧。

而跟我對唱最多果位朋友，家陣已經乃兩子之母喇！咁，Regine去左邊呢？