2013年12月24日星期二

交換聖誕禮物的好提議

各位好友,聖誕快到,今晚或者之後幾天你地都有機會參與派對,當中少不免有交換禮物機會,又或者,抽獎。

好多朋友都覺得我多鬼主意,又或者,賤。所以,突然想起交出以下提議,但我提出的,都有幾項想法:第一,不會大節流流咒人;第二,盡量都是用得著;第三,樂而不淫。希望以下提議可以幫到大家,又或者,Inspire到大家去諗更有創意既想法。(利申:我無收錢賣廣告的)




1。鑽石媒人Meiling姐所寫既--男人經
適合對象:一班姊妹聚頭,姊妹的定義,因人而異
原因:書中自有黃金屋,讀書一定好!無論姊妹們有著落定係無著落,多睇專業人士講解男人心態總對日後與男性相處有百利而無一害。況且,若果姊妹們面對多少個夜夜寂寞的夜晚,睇呢類書的確可以令個人積極進取,人生突然充滿希望。

另類用途:放此書於床頭,以Meiling姐既尊容,包保所有牛鬼蛇神急急如律令地退避三舍!

2。趙勁皓-人魚線上的卡夫卡/何浩文-戀上幸福之味
適合對象:為食的饑喝的需要瘦身的姊妹,姊妹的定義,因人而異
原因:健身成日得把口,總要有動力嘛!搵個教練之前睇睇辦係咪開心好多?各位有錢又想瘦既,最岩就係睇完搵阿King做私人健身教練,係唔係?文靜為食既又可以學整甜品,到時多一瓣手藝係咪搵男友都易d?當然,最重要係,兩本書有得學有得睇,一舉多得架!
重要提示:早排行過三聯,全線特價,呢個時候入貨交換禮物,岩晒啦!

3。驗孕棒
對象:已婚未婚只要有機會有仔生既都岩用
原因:好多朋友恨生仔,咁你想祝佢願望成真,最好就係送驗孕棒啦!總好過你送多仔佛之類祈福黨東東實際嘛!若果未婚既朋友,無論男男女女,收到都有個好用途:就係警惕佢地小心行事,切勿攪出人命,到時樂極生啤就唔好啦!
注意事項:1。請去有信譽商舖購買,以免發放錯誤訊息,當朋友真係要用。2。千祈千祈千祈唔好送俾單身宅男,唔玩得果隻,係會發火的。

4。平價二手唱片一堆
適合人士:限定禮物銀碼為幾十蚊果隻而你又係超級音樂愛好者,如本人
原因:你無行開二手唱片店,你梗係唔知:總會有一堆十蚊兩隻甚至五隻唱片出售,當中又並不一定全係西歌,亦可能有好野。你知啦,你身邊好多朋友都唔多尊重知識產權,買唱片俾佢地,一來可以教佢地聽歌要買碟,二來可以推介好音樂過佢地,你話係咪好high先!
另類玩法:若果見到例如最佳女主角卿卿既舊唱片,都唔平架,可能近百,買黎送俾朋友,包保佢地開心到不得了。

5。iTune充值劵
對象:果迷/蘋果用品使用者
原因:既然佢咁鍾意買app買sticker買歌買片,與其你徙錢買左樣佢見到會強顏歡笑既東東,倒不如買樣實際少少,等佢日後用Line時多Stickers send俾你,得閒上去買番套戲睇睇,總好過睇賣tv.com啦!
注意:都係果句,若果明知對方係三叔粉,咪玩啦!

6。民記工聯會蛇齋餅粽旅行團
對象:好憎人民力量等愛維穩既朋友
原因:其實一直對於此等團體舉辦之旅行呀一日遊活動深感興趣,亦曾經諗過不如此blog第一次非正式聚會就集體報名去玩餐飽食餐飽,更加可以明白和而不同,並可能因了解而結合,你唔知架嘛!了解你朋友既喜好,幫佢報埋名,陪埋佢去,就算係最後都係道不同不相為謀,你都可以增廣見聞。
注意事項:唔該,見到有乜事都要忍口,以免招致不必要既危險。

7。奶粉乙罐
對象:剛剛有仔女既朋友
原因:好簡單,大人唔食細路都要食,你咁有心了解佢仔仔女女食乜奶粉,然後班到俾佢,佢肯定感動到不得之了,大家既友誼一定比萬里長城更長。
注意:唔好買水貨,食落肚架,穩陣少少好。

8。新城勁爆頒獎禮入場劵
對象:恨睇演唱會又唔肯俾錢而boxing day無節目
原因:節目長到唔恨,歌手多到你認唔到,仲有大家公認新一代TVBuddy阿Bob做主持,最岩就係悶到爆又未去過既朋友見識新城有幾愛音樂,當佢係現場有機會見到紫昕姐姐甚至家燕罵媽,肯定成為佢2013年最大高潮!

夠鐘走人喇,暫時諗到咁多,歡迎大家年尾流流,交流交流!

沒有留言:

發佈留言