2012年11月21日星期三

大騷爛鬥爛

當大家唔明白或者越黎越唔高興政府批極都批唔出新免費電視牌照,其實我都有同樣疑問,雖然好多人會話:依家都唔多睇電視架啦,但,因為電視唔好睇,而有其他競爭者的話,或者我會睇多D呢?點計條數,都應該俾多幾個人玩!

岩岩星期日一兩個免費電視台分別製作一個大騷:亞洲先生與及台慶。你叫我坐定定睇就免,不過錄落黎笑又可以,悶就Fast Forward。結果,呢兩個節目,真係爛到不能。


先講亞洲先生:其實都無乜人留意,亞視無收視率已經唔係乜野新鮮事,正正因為咁,佢地應該做得更放更無包伏,認真做,就算收視唔好,起碼都有口碑嘛!可惜,當晚呢個節目之唔認真,實在以為自己睇緊精裝追女仔2既老周電視台:鏡頭成日唔知Pan左去邊,介紹評判果陣跟唔切名,而更好笑係影住果位名流界卓韻芝既萬寶寶果陣佢玩緊iPhone。

好,節目內容呢?果條一直話係賣點既閃閃泳褲,真係好想知係邊個品牌,好似尿片!超核突!不過最頂癮都係下一部份,兩個兩個參賽者玩騎蠻牛!如是者就玩左九節!然後每次旁邊有位類似歡樂小姐報時,竟然用一塊執都無執過既白板然後用箱頭筆寫上去,是但成咁,你話係你老周電視台?去到最後杜麗莎唱歌,每位參賽者用個膠兜裝住幾個地球放入模型,果個膠兜,絕對似大叉樂蓋住食物果隻透明膠蓋!

成場騷悶到震,仲要直播但Overrun,最最神奇係,雖然我不停Fast Forward,成個節目既廣告時間係無商業廣告架!咁,呢個電視台點生存架?

好,講下台慶。我開始錄果陣已經係一班藝員唱經典電視劇主題曲,果下實在想講粗口:唱既Hae,跳既又Hae,仲要播帶;然後,又係家燕媽媽關菊英,真係唔FF都唔係人。

然後果個乜野女神愛上網,Well,好似掛臘鴨咁慢動作,唔知佢地做乜,無睇頭!男果班仲爆笑,由停車場跳到入廠,又係唔知做乜。練到變傷兵,仲要唔好睇,何苦呢?

搵男女藝員拍趣劇再配音,女果部份超無聊,男果部份,其實都係用番男藝員扮女人,但果部份又幾好笑。之後台慶劇,老實,曾志偉未出場發神經掟野核突之前,其實都幾爆笑,可惜,曾先生硬係要做埋呢d野,真係乜都破壞晒。

唯一可取就係介紹新男女藝員,雖然,有幾個真係年年都仲係新力量,但至少呢部份,下年或者都值得繼續。

其實,台慶有乜好睇呢個騷點做至好呢?實在好難答。不過一個獨大電視台,例行公事至此,你話,係咪多電視台至係路呢可!

沒有留言:

發佈留言