2012年7月9日星期一

我永遠的黑名單:鳴門魚湯麵亭

日本菜,正所謂平有平食貴有貴食,你收乜價錢我用邊把呎去度你,不過若果真係物非所值,我最多唔會再去,但未致於要咁絕寫成永遠的黑名單。

咁,呢間位於港島西半山鳴門魚湯麵亭有乜能耐得到呢個殊榮呢?或者就如佢
官網一樣,黑到乜都無。

星期日,與住附近朋友約食飯,諗住試試佢。十二點鐘,無乜人,入去坐定定,睇睇午市定食餐牌。我見魚生飯方面帆立貝前面唔知點解硬係加上山葵兩個字,問經理佢解極我都唔明,又唔係加左入去,咁碗碗魚生飯都有Pat Wasabi架啦,你講乜呢阿Sir?

好,我點『山葵帆立貝免治蔥吞拿魚腩飯定食』盛惠HK$108,朋友點就無山葵帆立貝。本來想點海膽飯,呀經理話唔當造來貨唔靚喎,哦。

咁,前菜之類出現喇:

都係咁啦無乜特別,我唔會亂插人既。

主菜出現,O晒咀:

免治蔥吞拿魚腩,一睇就知用Blender攪出黎,無野呀嘛?你當我傻仔定外國人?攪到咁,同開一罐貓罐頭有乜分別?所有日本餐廳,收你一百蚊頭下果隻,都係師傅用刀剁,未見過一間咁夠膽死用機攪,然後疑似再用手係上面整到唔似用機攪。

喂,你收緊我幾錢一位呢?

好,食得條氣好唔順,都算喇,志在同朋友聚舊。叫完埋單,唔知點解著短褲既我,左小腿有少少癢,下意識用右腳整整佢,結果:

費事放大喇,小強有我三份二隻中指咁大,俾我右腳伸一伸,半死狀態。

叫經理過黎,我塊面已經黑晒,佢除左唔好意思,立即用廁紙毀屍滅跡之外,就係去出過張單。

結果?免我加一囉!不過我唔向食環投訴,我都一定係度話俾大家知:呢間野,我誠意推介大家咪去。

沒有留言:

發佈留言