2012年2月19日星期日

上樓,尚可

與外國回港的中學同學飯聚,他的要求是:不吃日本菜。由於他在美國生活,我也自行避免選擇西餐。於是,吃飯地點是旺角,發現找一個三個人吃飯坐得舒舒服服的地方有點難度!左思右想,再在開飯找找找,於是拍板雅蘭的阿詩瑪。

早一晚至電沒人接電話,當天中午再至電,依然沒有人接聽,於是把幾火打去太古分店:『旺角執左喇。』只怪開飯未來得及更新,也難怪,現時的食肆很多都是期間限定。於是,再努力去找,找到荷里活中心的『上樓』。


此店吃的是上海菜,乃屬稻香集團的,同層另一邊賣潮菜,所以很容易找錯的。裝修不錯,不過那套茶壺茶杯的設計著實高智能:

即咁,金屬杯,熱茶一斟,完全無可能囉起,邊個諗出黎架?!

講食物先:價錢中價,食物選擇大眾化,咁,去片啦不如:

油炆筍與鹽水鴨:前者感覺良好,合格;後者亦是,入味,不會骨多過肉。


這個賽磅蟹不及格!無乜味,水汪汪,夠判佢死罪未?

包點類:小籠包皮唔夠薄,不過尚可;反而鍋貼唔錯,煎得香口。

雪菜肉絲炒年糕,此乃當晚不俗菜式,炒得夠乾身,年糕有咬口。

係呀,獅子頭呀,味道可以,賣相唔得。

呢個水煮牛肉係全晚另一失望之作:水煮者,並唔係有層辣油就係,而味道係要咸中帶麻香而辣。呢個味道唔合格,而且內裡薯粉不夠,只以芽菜頂檔,牛肉又沒有牛味,明顯梳打粉醃過頭,咁,唔好食囉。

咸肉津白,可以,不過唔明點解有幾粒豆?

咁食法,連茶位每人百七左右,唔係好抵食,水準又唔會令我再黎咁囉。

沒有留言:

發佈留言