2011年4月23日星期六

令人失望的大漠

朋友聚會,攻打四方城之後提議去土瓜灣光顧大漠,他們表示很喜歡,我也會很喜歡云云。他們當然知道,我家附近那間巴依是我的永遠心水之店,大漠同樣也賣新彊菜,他們覺得好過巴依。

好過巴依?即管試試,結果是覺得,這間故意遷就香港人口味再加Fusion的新彊菜店,整體都不大好,而且,好很貴。




裝修有下過心思,這方面比巴依精緻,不過店又不是得別寬倘。好,食物又如何?

這個烤羊肉串,一放入口好似幾好食,再嗒真少少,其實係試圖用喪多孜然粉去令佢香口,實質肉質普通,亦不夠羶,吃羊沒有羶味,沒意思。桌上的幾種調味料的出現,簡單解釋就是其調味沒有信心,美其名給食客自行加味,實際就是沒有想向食客推介的味道。
這個炒土豆絲極不好吃,首先我吃過的都是酸酸辣辣,土豆絲切得幼幼的,這個嘛,放提子干不要緊,但味道怪怪的,曖曖昧昧,完全不知是什麼味道,又好似有少少甜,咁點先?
忘記了名堂,但都是羊,感覺是,不會難吃,但是都是羊味普通調味料行先。
這是朋友們極力推介的羊肉薄餅,擺到明Fusion,的確是薄薄一片,芝士味濃,不過好食就好食喇,問題係兩個:一,真係完全唔係新彊菜,二,駛唔駛咁貴?
手抓羊肉,把鬼,湯已經唔好味,羊肉又唔夠鬆化,巴依果個,正宗好食好多!!!
好食就要讚係咪?呢個炸哈密瓜羊腩,香口得來哈密瓜既清甜與羊肉既肥Crossover得好好,值得一吃!
又唔記得名堂,應該係羊肉丸,只記得果個疑似茄汁唔知有乜特別,簡單黎講,就係唔覺得係食緊新彊菜,西餐又唔係,仲要唔平播!
另一鬧爆之作:炒氈牛肉,炒出黎濕濕地,又係唔知佢想Present乜野味道比我,底下果d哈密瓜都叫清甜丫!至慘係,有乜特別呢?你用牛肉炒都無分別架。貨比貨既原因係我早前係巴依食既同一道菜,好食得多喇!
炒紫椰菜喎,又係濕濕地甜甜地,唔好食,唔知佢想點!
火都黎埋應該係呢碟:涼伴豆腐,想點?個醬唔好味,真係涼既,真係豆腐,咁駛唔駛收我幾十蚊一碟呀?唔該你啦!
我好記得呢個呀!濃湯羊肉麵,好細碗架咋,四十幾蚊,湯唔好飲,料好似好多但雜水咁款,總之咁細碗全檯八個人都唔係好受歡迎。
呢個千祈唔好叫,特級搵笨實之作:醬燒羊西冷,得果幾件成舊水,果個茄汁好似西餐茄汁,羊西冷唔知點解係西冷,直頭覺得俾人呃錢咁!
濛左我都記得佢!羊肉碎薄餅,大家共同感覺係:點解咁似本地茶餐廳既免治牛肉果隻味既呢?又係難食之作!
最後呢個無期望之下既驚喜,桂花羊奶凍,桂花味剛剛好,清甜好味。

果晚真係兩舊幾水一位,好唔值,又唔好食,我諗去巴依開心好味好多。菜式咁多花臣賣相幾靚都好,唔好食九唔搭八就都係把鬼。肯定唔會再去!

沒有留言:

發佈留言